Goierri Telebista
Sprint modalitateko Euskadiko Txapelketan parte hartuko dute Trigoikoek bihar
Trigoi Triatloi Taldekoek ez dute atsedenik hartzen, eta asteburu honetan ere txapelketa izango dute. Lekeition (Bizkaia) jokatuko den sprint distantziako Euskadiko txapelketan parte hartuko dute bihar, azken asteetan lortu dituzten emaitza onak errepikatzeko asmoz.
Astero-astero, lortutako emaitzen berri ematen dute Trigoikoek, eta gaur, aurreko asteburuan lortutako emaitza bikainen berri eman dute. Zarauzko triatloiean eta Donostiako sprint triatloiean parte hartu zuten Trigoikoek. Zarautzen jokatu zen proba, maila altukoa izan zela esan dute. 700 parte hartzaile inguruk parte hartu zuten, eta Trigoikoak “txukun” aritu zirela azpimarratu dute.
Halako probetan esperientzia duten Trigoiko kirolariek sailkapeneko aurreko postuetan amaitu zuten proba. Lehen aldiz parte hartu zuten taldekideak berriz, gustura agertu ziren proba amaitzea lortu zutelako.
Taldeka lortutako emaitzarekin ere pozik daude goierritarrak, “triatloiean parte hartu zuten 64 talderen artean, Trigoi 8.a izan zelako”. Zarauzo proban Trigoi taldeko Naroa Arrieta, Ane Mendia, Aitor Azurmendi, Etor Mendia, Harkaitz Arruti, Andoni Ibarbia, Luis Elizalde eta Xabier Morillo aritu ziren.
Donostian txapela lortuta
Aurreko asteburuan Donostian jokatu zen sprint modalitateko Gipuzkoako txapelketan ere parte hartu zuten Trigoikoek. Parte hartu bakarrik ez gainera, garaipena ere eskuratu baitzuten hainbat kategoriatan. Azken hilabeteetan asko hobetu duen Adur Eskisabelek 16. postuan amaitu zuen sailkapen orokorrean; Junior mailan ordea, bigarren egin zuen eta Gipuzkoako txapela ere irabazi zuen. Maite Murgiak ere Gipuzkoako txapela lortu zuen junior mailan. Beteranoen mailan berriz, hirugarren egin zuen Daniel Zabalo taldekideak.
Trigoi TT-k itxiera eman dio duatloi denboraldiari
Distantzia luzean Euskadiko txapela lortu du Trigoik
Hirugarren urtez jarraian irabazi du Trigoi Triatloi Taldeak Duatloiko distantzia luzeko taldekako Euskadiko txapelketa. Asteburuan jokatu da lehiaketa, Arrigorriagan (Bizkaia), eta goierritarrek proba «bikaina» egin zuten, «taldeak maila altua ematen jarraitzen duela erakutsiz», taldekideek adiaerazi dutenez.
Emaitza bikain horren erakusgarri dira Leire Etxezarretak bigarren postua lortu izana, eta mutiletan Luis Mari Urizar hirugarren sailkatu izana. Bizikletan egindako lan onari esker lortu zuen Urizarrek hirugarren postua.
Taldeka Euskadiko txapela lortu izana ordea, «talde lanaren emaitza» izan dela azpimarratu dute Trigoikoek, Etxezarretak eta Urizarrek lortutako postuez gain, gainontzeko taldekideek lortutako postuei eta denbora onei esker lortu baitute txapela. Joxi Garmendiak eta Aitor Azurmendik egindako lana azpimarratu dute Trigoikoek. Parte hartzaile horiekin batera lehiatu ziren Arrigorriagan Naroa Arrieta, Iban Iturri, Harkaitz Arruti, Gorka Insausti eta Andoni Ibarbia taldekideak ere.
Bizkaian jokatutako proban, 12 kilometro egin behar izan zituzten lehenengo kirolariek. Ondoren 76 kilometro bizikleta gainean, «aldapaz beteriko ibilbide batean», eta amaitzeko, beste 12 kilometro korrika.
Egindako lanaren saria
Duatloiko distantzia luzean hirugarren urtez jarraian txapela lortu izana, «kirolariak egiten ari diren lan handiaren saria» dela esan dute Trigoikoek.
Izan ere, denboraldia hasi denetik, euskal zirkuituko lasterketa guztietan parte hartu dute goierritarrek, eta proba guztietan «presente eta punta-puntan» egon dira. «Taldean gauzak ondo egiten ari diren seinale da Euskadiko txapela» triatloilarien ustez.