Berria, Ekaitz Agirre, 2009-03-06.
Jon Erguin. Eskiatzailea eta triatleta.
Munduko Triatloi Txapelketan 19. sailkatu da Jon Erguin; iraupen eskia, mendiko bizikleta eta korrika uztartzen dira neguko triatloian.
«Ez naiz ezertan espezialista, baina hiru alorretan moldatzen naiz»
Kirolzalea da beste ezer bainoago Jon Erguin (Beasain, Gipuzkoa, 1980). Haurra zela jantzi zituen estreinakoz eskiak, Aralarren, eta urteak daramatza iraupen eskian. Hiru urte dela hasi zen triatloi zuria prestatzen, eta ziklo krosean nahiz mendiko duatloietan ere badu eskarmentua. Espainiako neguko Triatloi Txapelketan bigarren sailkatu da azken bi urteotan, eta munduko espezialista onenekin lehiatzeko aukera eman dio horrek. Munduko Txapelketa jokatu dute berriki Austriako Gaishorn herrian, eta 19. izan da Erguin. Gipuzkoako iraupen eskiko txapelketa irabazita bukatu du neguko denboraldia.
Somporten Gipuzkoako txapela jantzita bukatu duzu neguko denboraldia. Gustura egindakoarekin?
Denboraldiko helburu nagusia Espainiako Txapelketan domina bat irabaztea nuen, eta bigarren sailkatu nintzen. Europako eta Munduko Txapelketan parte hartzeko aukera eman zidan horrek. Neguko denboraldia Gipuzkoako iraupen eskiko txapelketa irabazita bukatu dut, gustura. Irailean hasi nuen denboraldia eta lasterketa askotan parte hartu dut; mendiko duatloiak, ziklo-kros lasterketak, iraupen eskia, triatloiak... Txirrindularia ez izanik Gipuzkoako ziklo-kros txapelketa irabazteak ilusioa egin zidan; orain atsedena hartuko dut. Munduko Txapelketan bigarren urtez parte hartu eta 19. sailkatu zara, Gaishornen (Austria).
Zer irakurketa egiten duzu?
Europa iparraldeko herrialdeetan tradizio handia dute elurretako kiroletan, eta haien artean ahalik eta paper txukunena egiteko asmoz joan nintzen. Lehenengo hamabosten artean sailkatzeko itxaropena nuen, eta ez ninduen erabat gogobete. Maila oso altua da mundialean eta jendea triatloiaren hiru alorretan asko ibiltzen da, eskiatzen batez ere. Norvegiarrak, austriarrak, suediarrak, errusiarrak... gu baino gehixeago dabiltza. Nolako lasterketa izan zen? Korrika hasi ginen, ondoren bizikletan eta eskiatzen bukatu genuen -7,5 kilometro korrika, 12,5 bizikletan eta 10 eskiekin-. Europako eta Munduko Txapelketan hori da proben ordena, sorreratik triatloi zurian erabili dena. Zirkuitua polita zen, eta eguraldia, negukoa; elurra egin zuen gelditu gabe. Hasi eta bukatu eutsi egin nion erritmoari, eta bizikletan nahiz eskiekin gutxik aurreratu ninduten, eta nik ere gutxi gainditu nituen. Eskiatzen galdu nuen denbora gehien.
Eskia, bizikleta, korrika. Zertan moldatzen zara ongien?
Haurra nintzenetik eskiatu dut, eta eskiatzen moldatzen naiz ongien, bizikletan ondoren, eta korrika azkenik. Ez naiz espezialista petoa ezertan, baina hiru modalitateen arteko oreka dut, nahiko ongi moldatzen naiz.
Hain jarduera desberdinak uztartzeko nola prestatzen zara?
Denetik egiten dut, eta triatloian ongi moldatzen banaiz, hiru modalitateetako bakar batean espezialista ez naizelako dela uste dut. Haurra nintzenetik eskiatu dut, mendiko bizikletan ibili naiz, areto futbolean... Duela hiru urte hasi nintzen lasterketetan, gutxi entrenatuta ongi moldatzen nintzela ikusita. Gehiago prestatzea erabaki eta hala ari naiz azken bi urteotan. Astez, korrika, denbora faltagatik, eta, asteburuetan, bizikletan edo eskiatzen.
Triatloi zuria elurretan jokatzen dela aintzat hartuta, oztopo edo muga handia al duzue elur falta?
Ondo prestatzeko elurretan asko ibiltzea komeni da. Bizikletan, adibidez, elurretan ibiltzeko konfiantza hartu behar da, eta gu ez gaude ohituta; zer gurpil erabili, zer presiotan... elurretan bizikletan ibiltzeko aukera oso gutxi izaten dugu. Eta eskian zer esanik ez, Europako iparraldeko herrialdeetan kirol honen tradizioa eta garrantzia oso handia da.
Triatloi zuriak zuria izan behar du, ezta?
Bai, baina ez da beti horrela. Elurraren baldintzen arabera, adibidez, bizikletako ibilbidea moldatu egiten dute; elur gogorrean ongi ibil daiteke, baina elur bigunak asko zailtzen du. Espainiako Txapelketan 2. sailkatu zinen iaz, eta, aurten, Victor Loboren atzetik -bost urtez jarraian irabazi du-.
Koska bat gorago al dago?
Beste puntu bat dauka; oso ona da, eta oso indartsu iristen da neguko sasoira. Zertan huts egiten duen galdetzen dit jendeak, baina hiru alorretan da oso ona. Hari irabazteko egun txarra eduki behar du, eta nik egun ona. Neguko triatloia gure artean jarduera ezezaguna da.
Ari al da indartzen?
Boladak izaten dira. Aurten, elur asko egin du, eta iaz baino jende gehiagok parte hartu du. Eneko eta Hector Llanos, Patxi Vila... kirolari ezagunek, gainera, sona ematen diote lasterketei, baina ez nuke esango indartu denik.
